الخميس، 20 يونيو، 2013

حواديت مثلية مفروسة : متقولش لحد ... بتكلم جد !




متقولش لحد ... بتكلم جد

قريت مقالة عن موضوع الخروج من الخزانة في العدد لي فات من المجلة وكانت وجهة نظر محترمة بس يعني أنا عندي رأي ثاني خالص ... اشترو مني بس .

أكيد كل واحد فيكم فاكر اليوم المشمس الجميل لي عرف فيه أن هو مثلي وكانت السعادة بتشع من جواه وزغرت قلبك ويافرحة أمك بيك يا مثلي . الحقيقة يا جماعة أن اليوم ده بالنسبة للمثليين العرب هو يوم أغبر مطلعتلوش شمس خالص وأنا شخصيا عرفت هويتي الجنسية وأنا عمري حوالي 14 سنة كنت وقتها مدهولة على عيني وواقعة في غرام بنت زميلة لي في المدرسة وكنت بفتش عن أي حاجه تفسر لي أنا فيه ... كنت يا عيني مش عارفة ليه كنت لاصقة كده في البت ومش عاوزه أشوف ولا أكلم حد غيرها وبفكر فيها على طول .المهم عرفت أن ده يبقى مثلية .طبعا وقفت قدام المرايا وصقفت لنفسي جامد لحد ما إيديا وجعتني وبعدين مسحت دموعي وكملت المشوار ولا كأني اكتشفت حاجة .
خبر زي ده مش ممكن تروح تزفه لأمك أو لأبوك مثلا دول كانوا يصقفولك وعلى طول يعلنوا وفاتك وقدامك .
ورطه مش كده ؟ بس ورطه لازم تكتمها يعني مفيش صرصور لازم يعرف إنك عرفت أنت إيه هويتك لي مفيش حد حواليك متقبلها ولا فاهمها أساسا. اتصرف طبيعي وإذا في يوم جالك إحساس قوي إنك لازم تروح تقول لحد فلازم تضرب نفسك بالألم عشان تفوق من أوهامك وتطرد الإحساس الخايب ده أصله بودي في داهيه بعيد عنكم وطول ما إنت عارف إنك في مجتمع عربي محافظ يبقى لازم تعرف كمان أنو مينفعش خالص أهلك بالذات يعرفو حاجة زي دي ولو عاوز تقنع نفسك أكثر بخصوصية الموضوع وحقك في التكتم على هويتك اسأل نفسك ليه مثلا مفيش حد مغاير جيه عندك واعترفلك أنو مغاير وشرحلك الأسباب وطلب منك متكرهوش ؟؟؟ صعبة مش كده . أهو انت زيك زي المغاير .أنت كمان مش مضطر تروح تشرح لحد أنت ليه بتحب فلان ومش فلانة !

أهلك بالذات مش لازم يشمو خبر لأنك مش بس هتخسرهم أنت كمان حتتبهدل وحتلاقي نفسك فجأة عايش في مسلسل درامي بخمس آلاف جزء كل جزء 966 حلقة . بلاش تهور ياجماعة عشان احنا عارفين لي حوالينا كويس أوي سواء كانو أصحاب أو أهل أو زملاء مفيش حد فيهم مستعد يسمع حاجة زي دي سواء عنك أو عن غيرك . أيوا استحمل تشيل سر هويتك معاك أحسن متشيل بلاوي توقع على راسك لما الناس تعرف عشان للاسف حتلاقي في قصص وحكايات بتتقال عنك ومفيش حد حيسيبك في حالك . وبعدين يعني أنت لما تروح تقلهم انك مثلي حتعرفهم بعد كد على حبيبك مثلا ؟ أو حتطلب منهم يروحو يخطبوه ؟ مفيش حل للموضوع غير أنك تركز على مستقبلك وتحافظ على الحد الأدنى من الخصوصية في حياتك ولو كنت محظوظ وبتعرف ناس مثليين متصيعش أوي .

لما أبص حولي وأشوف تجارب المثليين لي طلعو من الخزانة واتكلمو عن هويتهم ألاحظ أنهم إما عملو كده لأنهم أصلا عايشين خارج الوطن العربي زي حالاتي أو إنهم أبناء أهل متفتحين وكل حاجة ماشية زي الفل ودي طبعا نسبة واحد في المية أو أن المسألة كانت لحظة شجاعة ومعندهمش مشكلة يواجهو زي كثير من اصحابنا لي عملو فيديوهات وطلعو فيها علني والحالة الأخيرة أنهم اعترفو بهويتهم نتيجة ضغوط أو شك وعايشين دلوقتي أيام سوده وعاوزين يهربو من لي هما فيه ودي بقدر أقول نسبة كبيرة جدا من المثليين. في كل الحالات المثليين العرب مش مرتاحين ولا عايشين في أمان سواء اتكلمو أو سكتو وكل واحد فيهم حاطط إيده على قلبه ومره بيفكر في نفسو ومره بيفكر في أهلو وفي الناس.

سارة - مقتطف من العدد 13 من مجلة أصوات

إلى الأعلى